教典例句四个發音人
「買賣算分，相請無論」出現佇四个所在
教典有一句俗語真特別：「買賣算分，相請無論」
這句話佇教典的例句出現四改，四个版本的音檔拄好攏是無仝的人錄音的，揣這句話你就通好聽著教典例句四个發音先生的四个版本。
舊年教典更新增加例句的音檔，除了原底的主詞目音檔發音人王秀容先生以外，閣有林月娥、林良儒、林淑期三个先生的聲音
這句話擔任「買賣 bé-bē」、「相請 sio-tshiánn」佮「論 lūn」三个詞目的例句，家己閣有一个獨立條目。 「買賣」的例句是林淑期先生錄的；「相請」的例句是王秀容先生錄的；「論」的例句是林月娥先生錄的；獨立的「買賣算分，相請無論。 」條目是林良儒先生錄的。
其他像這種一个例句做真濟詞目例句的案例閣有以下兩个例：
-
「囡仔人有耳無喙。」
出現佇「囡仔人 gín-á-lâng」、「喙 tshuì」、「有耳無喙 ū-hīnn-bô-tshuì」三个條目佮家己的獨立詞條。 「囡仔人」佮「有耳無喙」的例句是王秀容先生錄的；「喙」的例句是林淑期先生錄的；獨立的 「囡仔人有耳無喙。」詞目是林良儒先生錄的 -
「校長兼摃鐘。」
出現佇「校長 hāu-tiúnn」、「兼 kiam」、「摃鐘 kòng-tsing」三个條目，嘛有家己的獨立詞條。 「校長」佮「兼」的例句是王秀容先生錄的；「摃鐘」的例句是林淑期先生錄的；獨立的 「校長兼摃鐘。」詞目是林良儒先生錄的
若是論利用率，「校長兼摃鐘。」有夠環保，五个字拆做三个詞條全部攏用著矣 😅，類似的例閣有「小叔仔 sió-tsik-á」，分別擔任「小 sió」、「叔 tsik」、「仔 á」的例句喔