有關「字音修訂公告2年」

Jul 6, 2025

教典僻智識系列第 38 篇

這篇文章是台文

今仔日欲來研究一个無啥重要的公告文字，教典有一个「字音修訂」頁面，遮會公告教典針對用字、字音的修改內容。這个頁面一直有寫「公告 2 年」四个字，但是像逐家所看著的，今已經是 2025(114) 年矣，哪會一直到 2012(101) 年的修訂猶閣佇遐咧？毋是講「公告 2 年」？請看紲落來我用 Web Archive 的稽考。

稽考教典改版修訂的歷史

教典正式版上線（2011.7.7）

教典2011.7.7正式版上線的頭一批改版說明頁面，字音修訂內容囥佇公告內底，無「公告2年」的文字

教典佇 2008.10.17 測試版上線，經過三冬 2011.7.7 正式版上線，上線的時陣有公告頭一批的字音修訂內容，彼陣是直接寫佇「改版說明」的頁面，並且無寫「公告 2 年」。

而且這批公告你若詳細去比對這馬的教典，你會發現這馬教典的改版修訂干焦有列甲 101（2012）的資料，並無這批，這批公告後來佇 2014(104) 的版本共提掉矣，後壁的段落會講。

101 改版修訂 (2012.12.11)

教典2012.12.11公告的101字音修訂，已經變做一个獨立的字音修訂頁面，並且有寫「公告2年」 — 教典2012.12.11公告的101 字音修訂，教典2012.12.11公告的第二批字音修訂，已經變做一个獨立的字音修訂頁面，並且有寫「公告2年」，已經變做一个獨立的字音修訂頁面，並且有寫「公告2年」

過一冬佇 2012 年底公告第二批的改版修訂，這个版本就共拆做獨立的「字音修訂」頁面矣，並且「公告 2 年」嘛是這个時陣寫起去的。

103 改版修訂共 100 的公告提掉

教典2013.12.26公告的102字音修訂，內底100的字音修訂猶有留佇遐 — 教典2013.12.26公告的 102 字音修訂，內底100的字音修訂猶有留佇遐

教典2014.12.15公告的[103 字音修訂](https://web.archive.org/web/20151017005520/http://twblg.dict.edu.tw/holodict_new/compile1_8_1.jsp)，100年的字音修訂有照「公告2年」的決議共提掉 — 教典2014.12.15公告的104字音修訂，100年的字音修訂有照「公告2年」的決議共提掉

閣過兩冬，佇 2014 的 103 字音修訂公告的時陣，有影就共 100 年的字音修訂內容提掉矣。

閬三冬了後，無繼續執行「公告 2 年」

教典閬三冬佇2018.07.05公告107字音修訂，無共頭前 101~103 的資料提掉 — 教典閬三冬佇2018.07.05公告 107 字音修訂，無共頭前 101~103 的資料提掉

結果 104 字音修訂公告了後，中央閬三冬。佇 2018 年公告 107 字音修訂，這改就無執行「公告 2 年」一句話矣，舊的資料猶閣留佇遐。自彼了後的 109 字音修訂佮今年六月才公告的 104 字音修訂都無共以早資料提掉

現象小結

頭前掀遐濟資料，總講就是下跤的重點：

正式版上線的時陣的 100 字音修訂並無「公告 2 年」的文字，無獨立的字音修訂頁面
101 字音修訂公告的時陣共徙去獨立的字音修訂頁面，並且寫「公告 2 年」
103 字音修訂公告的時陣，有遵照「公告 2 年」共 100 年的修訂內容提掉
閬三冬了後的 107 字音修訂無共以早的資料提掉一直到今

原因調查、結論

趁這改參加教典編輯培訓研習，直接和教育部的周承辦人佮中教大的許小姐閣有林佳怡先生請教這个問題。林佳怡講彼陣「公告 2 年」的文字是伊寫的，彼陣就是想講毋免囥遐久，毋過 2018 年公告的時陣伊已經離開教育部矣，所以就是彼時公告的時陣並無繼續執行當初時的決議爾。周承辦人有講伊有注意過這四字，嘛真憢疑哪會以早的猶閣佇咧，但是往過無刣過所以毋敢動；佳怡先生是認為這留佇遐嘛好，方便逐家知影佗一寡詞條捌經過較大的修改，其實會當繼續留。

才閣看團隊決定欲按怎處理遮的公告囉，若是決議欲規氣就攏留咧，按呢凡勢應該愛共 2011 頭一批公告的 100 字音修訂表補倒轉去是毋 😆 毋知各位讀者又閣是按怎想。

有關 Web Archive

Web Archive 真正是一个足偉大的計畫，濟濟捌存在過的物件攏通好佇遮揣著一寡𪜶捌存在的證明，像教典初版本的試用版、彼陣閣有佮楊秀芳先生的本字研究的計畫的網頁「閩南語字彙」互相連結（根據這篇駱家鵬先生的文章）佇遮的古早網頁挖著遐濟趣味的物件，對濟濟先輩佇這个領域拍拚付出的成果是閣較有感情矣。

教典僻智識系列