教典相命術——揣著你的教典命運詞
教典啥物詞佮你上有關連？緊來揣看覓！
今仔日來講一寡怪力亂神，教典僻智識來教逐家按怎用教典相命 🔮
操作方式
https://sutian.moe.edu.tw/und-hani/su/你的出世月日
佇教典的詞目網址欄共彼个數字改做你的出世月日，來看教典當中你的命運詞目是佗一條，歡迎留話分享你的發現。像我佇 10 月 16 號出世，我的教典詞是「天庭 thian-tîng」呢，莫怪我的運途遐順利，因為有天庭咧共我顧啦 😆
有關教典的詞目編碼
教典每一个詞攏有一个編碼，其實你只要會當定一个規則通好產生教典編碼有的數字，就會當家己發明其他的相命方法喔。目前教典攏總有 27424 个條目，主要的詞目編碼攏佇 1-28107 之間，中央有一寡戮空。另外有三个單字讀音詞目「枷 kha、苔 tî、𨂿（⿰𧾷歪）uainnh」較邊緣，編佇 28601-28603。教典的每一个詞目攏會當透過佇網址輸入編碼入去伊的頁面，較趣味的是教典詞目當中較細漢的「近反義詞不單列詞目者」其實嘛有家己的頁面，只是平常時仔用搜揣的是看袂著的，像輸入「18333」就會當看著「批殼 phue-khak」的仝義詞「批橐仔 phue-lok-á」單獨的頁面。是講內底嘛無啥物其他資訊啦，看好耍爾 😅（閣有相命用途），有關教典詞目的階級僻智識以後閣再揣一工詳細共逐家分享。
舊教典的編碼更新
今年六月新版教典上線，詞目編碼有重新編一改，若去掀萌典佇 github 公開的舊教典原始資料就會看著兩代的編碼無啥仝款。這馬舊教典已經入土，舊的網址攏會自動轉去新的教典。舊編碼佮新編碼的對應嘛有做，這代表講你若是用新編碼算出來的命運詞你無佮意，你會當用舊教典編碼閣試一改 😜，我會佇留話區囥舊教典的網址格式，逐家會當用舊教典網址試看覓算出來的詞有啥精差，像我的生日就變做「歹食 pháinn-tsia̍h」，按呢我猶是信新教典予我的天庭好矣 😅1
（以上關係舊教典轉網址的僻智識由 莊銘彥 投稿提供）
-
這馬舊教典轉網址的服務已經無閣提供矣，若是無佮意家己生日的詞，就改用舊曆抑是其他數字囉。 ↩︎