參加日星鑄字行活版印刷台語導覽

2024 的 6 月 9 號參加 活版印刷小學徒 舉辦佇 日星鑄字行 Ri Xing Type Foundry 的活版印刷台語導覽 佮陳奕應該算是真有鉛（iân），我舊年咧準備佇 justfont 的台語字戀小聚的時陣就捌參陳奕請教過一寡鉛字時代的問題，這改看著這个台語導覽就隨報名矣。

就算已經來過日星足濟改，參加過 in 疫情今開始的時陣辦的線頂活字修復研習營，嘛看過張老闆上 hihi 導覽先生影片。這改的導覽猶是通好學著真濟新的資訊。嘛有現場體驗著抾字、看師傅共鉛字佮鉛字角疊做伙排版好勢共冊籤印出來的過程。

陳奕先生內容準備甲足頂真，口條嘛真好，無像我佇台頂講話會直直幌直直幌，強烈建議應該愛加收寡錢才著 😇 7/6(拜六) 猶閣有一場台語路主辦的日星台語導覽，聽講嘛是陳奕主講的喔，而且這改張先生閣會現場鑄鉛字予逐家看，我看 in 報名表單猶未收起來，應該是猶閣有名額，歡迎逐家緊去報名。 以下是個人筆記，分享予逐家：

啥物是活版印刷？

一个傳統的透過鉛字佮鉛字角排版做伙，原理佮頓印仔類似的一種印刷技術。鑄字行負責鑄字；印刷廠負責排版佮印刷。共需要的字抾出來叫做「抾字 khioh-jī」，一个專業的抾字師傅的速度一點鐘通好抾欲 1200 字的鉛字出來。

鑄字用的模具是「銅模 tâng-bôo」，用 gá-suh 爐共鉛角仔鎔去閣罐入去銅模內底就通好鑄鉛字，囥鉛字的所在叫做「字架仔 jī-kè-á」，字架仔頂面的字基本上照部首佮筆畫排列，閣有分做「常用字架 siông-iōng-jī-kè」佮「罕用字架 hán-iōng-jī-kè」，有一寡是常用字當中閣較常用的字，像「你」、「我」、「的」、「年月日」、「，。？」這種會閣囥佇「出張架 tshut-tiunn-kè」，因為遮的鉛字逐工攏欲出張，這个號名真趣味。

這馬敢閣有人咧使用活版印刷？

後來翕相排版佮電腦排版等等新的技術的出現漸漸共活版印刷取代矣，日星是這馬臺灣唯一一間猶有咧鑄字的鑄字行。這馬主要的用途嘛毋是印冊抑是印報紙矣，是印 mè-sì、卡片、光批為主。日星閣有予人客抾鉛字做印仔的服務，所以這馬較捷用的字較毋是「年月日」，「陳林王」顛倒較捷會出現。

台語文佮臺灣的活版印刷有啥物關係？

臺灣的活版印刷佮台語文關係足深足深，技術是傳教士共傳入來的。臺灣的頭一台印刷機就是就是馬雅各牧師佇 1880 年帶來臺灣的。彼陣無人會曉用，巴克禮牧師特別轉去學，後來佇 1884 年成立「聚珍堂」，閣發行臺灣頭一份報紙《TÂI-LÂM HÚ-SIÂⁿ KÀU-HŌE-PÒ》，閣有白話字聖經。

毋過日星以早應該攏是處理中文的物件為主，並無羅馬字的鉛字銅模，真可惜，毋知台灣敢猶有別位有保留白話字鉛字銅模。

尾仔閣補充一个八卦，張老闆講日星二號宋體的銅模修復當欲完成矣，今年年底嘛會佮 justfont 合作推出電腦字型的大眾傱錢計畫，逐家愛先共錢儉予好共鬥支持喔！