個人網頁重起

佇台文所的第一學期結束了後，了一個月的時間總算是重起我的個人網頁矣，以早 2020 年的時陣我捌創過我的個人網頁，彼陣舞真久創真濟功能了後煞囥咧生菇，干焦佇 2023 佇 justfont 辦演講了後有 更新一篇文章爾 ，彼陣對文章更新的流程抑是啥無共流程定予好勢，逐改欲舞都足費氣，所以就攏無處理。

這幾冬有當時仔嘛想欲重新來處理，煞逐改攏無堅持到底就放棄。其實嘛是寫袂少內容，但是攏掖佇面冊、threads 佮 HackMD，教典僻智識寫三十幾篇全部囥面冊，其實佇外口的設備若是無登入欲看是真痛苦，有一个家己會當掌握一切的個人網頁猶是真重要的代誌。

六月學期結束我就隨重新來舞我的網頁，真久無接觸相關的物件矣，欲按怎做都袂記得矣。皓梅叫我一定愛綴時行來 Vibe Coding，我就試看用 Cursor 輔助我的工課。結果有 AI 鬥相共有影真方便，往過濟濟愛查真久研究按怎創的物件，這馬真緊就通好理解。需要做啥物功能都會當佮 AI 討論。我猶是繼續用 Hugo，揣著一个真好看功能真簡單的主題 Quint 就隨開始做矣。搬教典僻智識的文章嘛順紲思考我所需要的功能。雙語功能、Carousell、系列文章等等的功能嘛是一步一步加起去的，嘛隨時寫真濟筆記方便我後來通好繼續維護。

總是講這改做的準備比往過加真濟，嘛有共最近的內容徙來遮矣，希望未來我會當繼續佇遮寫物件，予遮的內容愈來愈豐富。