教典編輯培訓初階研習DAY1

教典編輯培訓初階研習是一个教育部已經辦甲第 10 屆的研習¹，團隊會就這个研習培訓辭典編輯人員，閣有予較濟人捌較濟教典的代誌。

研習攏總三工，逐工透早九點至下晡五點足實櫼的課程，因為免錢閣提供食食，佇外縣市閣有交通佮歇暝的補助，聽講是一直攏真歹報會著，今年報名「教典編輯培訓初階研習」，誠幸運有通正取，身為寫欲七十張批的教典頭號熱心民眾，真正足有興趣聽以早編輯教典的先進講古早代。

今仔日的重要的主題就是「教典的發展歷史」，透早是姚榮松教授的課，下晡是林佳怡先生的課。姚教授是教典創立時期的總編輯，有講著真濟早期無仝時期的人員編制閣有參與的人；林佳怡頭開始是彼陣的約聘人員，後來變做上主要的行政，甚至有一段時間是伊一个人舞，今年佳怡先生特別分享就編輯佮執行者角度的教典歷史，閣有分享真濟古早時期的資料佮家私。²

教典真正是一个佇困難的社會環境濟濟人付出精神、專業佮愛，拍拚真久的成果，真正足僫去想像彼个時代連文字標準都猶未冤了的環境欲按怎做代誌。干焦是「文字標準」、「社會環境」、「科技發展」三个問題都頭殼𢯾咧燒矣。講不盡的困難、妥協佮遺憾是今仔日規日課程予我上深刻的所在。

教典發展的歷史佮故事有影是通好好仔共保留、記錄，並且愛囥佇人通好讀的所在，甚至愛出冊抑是辦展覽才著，多數人真濟對教典的憤慨其實攏是源自無了解，人若是較了解遮的故事，至少憤慨會轉換做無奈佮理解。才通有進一步閣較務實的改革的可能性。

規工的課程落來嘛寫幾千字的筆記，有機會才閣共遮的內容分享予逐家。