TASA jī-hîng hē-lia̍t: Tâi-gí jī-hîng tsiūnn thài-khong
Kin-á-ji̍t beh hām ta̍k-ke kài-siāu TASA jī-hîng hē-lia̍t, iā tō-sī bo̍k-tsiân lí tha̍k tsit-phinn bûn-tsiunn sóo khuànn--tio̍h ê jī-hîng. Tse sī Kok-ka Thài-khong Tiong-sim (國家太空中心, Taiwan Space Agency, TASA) ê tīng-tsò jī-hîng, ū uân-tsíng tsi-uān Tâi-lô kah Pe̍h-ōe-jī, iū-koh sī khai-guân siū-khuân ē-tàng bián-huì sú-iōng ê jī-hîng. lî-tshiánn tsuè-kīn mā tī Google Fonts tsiūnn-kè, ē-tàng ti̍t-tsiap tī Google ê hûn-tuan nńg-thé sú-iōng, mā ē-tàng iōng Google ê webfont ho̍k-bū.
TASA jī-hîng hē-lia̍t ū nn̄g-thò jī-hîng, TASA Explorer kah TASA Orbiter, guá ê bāng-ia̍h ê lāi-bûn sī TASA Orbiter, piau-tê sī TASA Explorer. TASA jī-hîng sio̍k tī kí-hô hong-keh sans-serif jī-hîng, ū tsiânn sin tsiânn hiān-tāi ê kòo-sìng. Kah tsú-liû tsok-gia̍p hē-thóng ê oo-thé hàn-jī jī-hîng mā tsin sù-phuè.
Tsit ê jī-hîng m̄-nā khai-guân, koh uân-tsíng tsi-uān Tâi-lô kah Pe̍h-uē-jī, lî-tshiánn tsò kah tsiânn iù-lōo, koh ū the̍h-kiong tsē-tsē bô-kâng tshoo-iù ê pán-pún--ooh. Variable font ê pán-pún ē-tàng uì Regular kàu ExtraBold tsi-kan suî tsāi lí tshiâu.
Beh án-nuá tī Google ê ho̍k-bū sú-iōng TASA jī-hîng?
Tī Google ê hûn-tuan nńg-thé tshi̍h "更多字型", tshuē "TASA" tō tshuē ē tio̍h tsit nn̄g thò jī-hîng, lóng kā kau--khí-lâi tō ē-tàng tī jīm-hô Google ê nńg-thé lāi-té sú-iōng--ah. Ē-tàng hōo lí ê Google pio-tuann tsìng-siông hián-sī lô-má-jī, mā ē-tàng tsò tâu-iánn-phìnn tíng-tíng ê iōng-tôo.
TASA jī-hîng hē-lia̍t ê kòo-sū
2023 nî TASA kái-tsè, uí-thok Tâi-uân ê siat-kè thuân-tuī Local Remote hū-tsik phín-pâi sī-kak kui-uē sóo tshòng-tsok--ê, mā hōo TASA tsiânn-tsò Tâi-uân thâu tsi̍t king ū tīng-tsò jī-hîng ê tsìng-hú ki-kuan. Nā-sī siūnn-beh koh-khah liáu-kái hit-tsūn ê siat-kè kòo-sū, justfont bat tī 2023 nî siá kué 1 phinn tsuan-tê bûn-tsiunn , ē-tàng uì hia khuànn.
Tsú-iàu hū-tsik TASA jī-hîng hē-lia̍t ê siat-kè-su Tiunn Uî-tiong(張維中) sian-sinn sī guán í-tsá Tâi-kho-tāi Siat-kè-hē ê tông-o̍h. Kin-nî in thui-tshut sin pán-pún ê TASA jī-hîng hē-lia̍t, tsing-ka tuì Tâi-lô kah Pe̍h-ōe-jī ê tsi-uān, Uî-tiong ū ti̍k-pia̍t tshiánn guá tàu khuànn, guá mā ū hōo i tsi̍t-kuá tiàu-hû tsō-hîng kah kerning siong-kuan ê ì-kiàn.
Lô-má-jī jī-hîng ê kerning
It-puann lán lóng lia̍h-tsún kóng tsò Lô-má-jī jī-hîng kah hàn-jī pí sī tsin kán-tan, in-uī jī-sòo khah tsió. M̄-koh Lô-má-jī beh tsù-ì ê sè-tsiat kî-si̍t put-tsí-á tsē, tshiūnn kerning tō-sī tsi̍t ê tsin hó ê lē.
Kerning tsit ê su̍t-gí leh kóng jī-hîng siat-kè-su tsiam-tuì lô-má-jī tsi-kan kū-lî ê si-á-geh. Kā jī-hû tsi-kan ê kū-lî tshiâu hōo koh-khah sù-sī tsū-jiân ê kang-hu. Pí-lūn kóng tíng-bīn ê tôo lāi-té thâu 1 tsuā ê "AV" kah "Wa" nn̄g-tsióng tsoo-ha̍p, jī-hîng siat-kè-su ē kā in ê kū-lî tshiâu khah uá--leh. Ba̍k-tsiu khuànn--khí-lâi tsiah bē làng tsi̍t ê phang. Iú-kuan Ing-gí ê kerning kah ian-jī ìn-suat ê li̍k-sú ē-tàng tsham-khó tsit phinn bûn-tsiunn .
Tâi-gí Lô-má-jī tsiah ū ê kerning
Tâi-gí Lô-má-jī ū 1 kuá Ing-gí khah bē tshut-hiān ê hû-hō tsoo-ha̍p, pí-lūn-kóng ū siann-tiāu hû-hō ê jī-bó, koh ū kah liān-jī hû-hō - tsi-kan ê kuan-hē ài tsiàu-kòo. Pe̍h-ōe-jī ê phīnn-im hû-hō ᴺ kah ⁿ mā sī tsi̍t ê tsin ti̍k-pia̍t ê kak-sik, in-uī i siá khah kuân, āu-piah nā-sī tsiap piau-tiám hû-hō , . ia̍h-sī liān-jī hû-hō - tō su-iàu tshiâu khah uá--leh, thâu-tsîng tú-tio̍h A mā ài tshiâu, tsiah bē lî siunn hn̄g ia̍h-sī làng tsi̍t ê phang.