教典編輯培訓初階研習DAY2
中晝的便當，健康閣好食
今仔日的內容就較大多數是我已經較捌的代誌矣，透早張屏生教授介紹教典定優勢腔、第二優勢腔的理由，閣有講伊以早替董忠司先生編彼本 臺灣閩南語辭典 的代誌，閣有兩个的比較；下晡 潘科元 先生介紹濟濟重要的台語字辭典，講真濟欲按怎理解無仝時代文獻的定位佮功能的鋩角，按怎看漢語韻書、近代韻書，閣有傳教士佮日本時代的文獻。程俊源先生較濟的時間咧餾一寡語言意識的內容，閣有講教典定字的原理原則。
張屏生先生佮程俊源先生是教典上最近兩代的頭人，我感覺較無彩的是𪜶兩个準備的內容攏較面對一般民眾，以介紹辭典原理為主，並無任何有關𪜶擔任承辦學術單位的部份的分享，我較想欲知影𪜶的拍拚佮無奈，可能愛以後家己去問才有機會通知影矣，畢竟這曷毋是「編輯教典文字」這个主題的必要的內容。
今仔日歇睏時間順紲寫一篇新的 教典僻智識
教典編輯培訓初階研習日記系列
- 教典編輯培訓初階研習DAY1
- 教典編輯培訓初階研習DAY2
- 教典編輯培訓初階研習DAY3