連字符入門②－「詞組」內底的詞「基本上」分寫

教典僻智識 系列第 24 篇
連字符號入門 系列第 2 篇

這篇文章是台文

#台文   #教典   #連字符號   #臺羅手冊  

今仔日欲來𤆬逐家做伙閱讀臺羅手冊連字符號使用基本原則第二條：

「詞組」內詞與詞基本上分寫，只有單音節之補語或單音節方位詞與前一詞連寫。

看起來這个「基本上」分寫的例外是像「桌頂 toh-tíng」、「大門後 tuā-mn̂g-āu」這種加上方位詞的狀況，閣有「做煞 tsò-suah」、「看著 khuànn-tio̍h」這種加上補語的情形。
講到遮可能你就感覺奇怪矣，昨昏講著的「攑手 gia̍h-tshiú」、「攑頭 gia̍h-thâu」敢袂當共看做是一个「動詞+名詞」的動詞詞組，然後共分寫咧？這兩个詞的組成嘛無啥物方位詞抑是補語啊？ 因為連字符號規則第六條閣按呢寫：

詞組慣用時可能發生「詞彙化」，既已詞彙化就已經不是詞組而是詞，因此音節與音節之間不可分離，必須連寫。

「攑手 gia̍h-tshiú」佮「攑頭 gia̍h-thâu」就是真好的「詞彙化」案例，「gia̍h」拄著「tshiú」佮「thâu」的時陣已經毋是伊原底的意思，愛共「gia̍h-tshiú」、「gia̍h-thâu」看做一體。所以我前一篇文章才會直接講「gia̍h-tshiú」佮「gia̍h-thâu」是一个雙音節的動詞。
毋過並毋是任何的狀況攏像攑手攑頭遐爾直覺，真濟狀況攏是語感在人，有人認為「鉸頭毛」毋但是單純的「鉸」，是規套的服務，閣愛 siat-tooh，愛連寫。毋過像教典的體例就是共分寫。

詞彙化語感測驗表單

詞彙化語感測驗表單

詞彙化語感測驗表單

表單連結

遮提供一个趣味的「詞彙化語感測驗表單」，共真濟教典類似的例攏整理理，歡迎逐家來寫看覓。就你的語感你會共遮的詞當做是分寫的詞組，抑是愛連寫的詞彙化的詞，寫了會共你講分數閣有教典的體例。像「包機」、「包餡」、「包豆餡」、「包紅包」、「包水餃」佗幾个愛連寫，佗幾个閣愛分寫咧？歡迎佇表單分享你的想法。 請注意，這个表單分數寫較懸並無代表你較厲害，干焦代表你的語感佮教典編輯人員較接近，若按呢歡迎加注意教典編輯人員培訓營的資訊，加入編輯教典的團隊 😉 啊若是你的分數足低嘛免緊張免煩惱，「詞彙化」的標準本來就隨人的語感無啥仝，無論你分寫抑是連寫多數的人攏看有，檢定考試嘛袂去考這，嘛袂共你扣分喔。

教典僻智識系列
  1. 巷仔內才知影的教典外來語詞
  2. 教典的「漢羅濫寫」例句
  3. 恁兜的滷肉飯是啥款？滷肉飯的詞目更新
  4. 教典阿明的一生
  5. 教典大惡人——名姓袂當講出來的「彼个人」
  6. 教典相命術——揣著你的教典命運詞
  7. 教典的「華語借音詞」
  8. 遮的詞恁兜攏按怎講？教典內底的「方言無差表」
  9. 「量量量量量」同學的名字有 32768 種讀法，你敢會曉唸？
  10. 注音做名姓嘛有讀音？
  11. 關係教典俗諺的一寡僻智識
  12. 教典上討厭的三種人
  13. 有​輕聲意思就無仝的詞
  14. 連寫詞組當中有大寫的詞目
  15. 教典教你按怎做人
  16. 教典十誡開放下載、列印
  17. 仝款漢字無仝音義的詞
  18. 教典收錄的假疊詞
  19. 大量名姓做一改揣——做一改講我的名
  20. 教典阿明的一生——第二季
  21. 教典例句四个發音人
  22. 教典地方僻智識
  23. 連字符入門①－「詞」內底的音節連寫
  24. 連字符入門②－「詞組」內底的詞「基本上」分寫
  25. 教典上長
  26. 教典上濟
  27. 台語聽寫練習系統
  28. 教典 ABC | CAB 詞目組
  29. 正規表達式入門①－基礎概念、按怎揣漢字
  30. 正規表達式入門②－揣羅馬字的撇步
  31. 教典的風聲
  32. 教典詞目詞性索引
  33. 教典新收詞 Notion 表格
  34. 教典十二生相
  35. 失控的教典俗諺語課
  36. 「術仔 su̍t-á」僻智識
  37. 教典2025新漢字音
  38. 有關「字音修訂公告2年」
  39. 教典2025新收詞 Notion 表格
  40. 活用教典101－講座參考資料
連字符號入門系列
  1. 連字符入門①－「詞」內底的音節連寫
  2. 連字符入門②－「詞組」內底的詞「基本上」分寫