教典阿明的一生

教典僻智識 系列第 4 篇

這篇文章是台文

#台文   #教典   #教典阿明   #例句  
有關阿明的例句，對各種人生階段攏有描述

有關阿明的例句，對各種人生階段攏有描述

2024.4.17. 更新：今年教典閣新增加 300 條詞條，其中「好頭喙」、「出眾」佮「閹雞行」三个詞條內底閣有講著阿明的故事，已經共寫入去下跤的文章矣。

使用教典「用臺灣台語查用例」功能揣「阿明」，就會當看著教典阿明的人生故事。自細漢到大漢的沓沓滴滴攏予教典例句記錄矣。今仔日的教典僻智識𤆬逐家來熟似教典阿明的一生。

阿明的故事

阿明佇一个三代同堂的家庭出世，有一个阿兄佮阿姊，自細漢 in 阿爸就對伊真照顧，五歲猶無啥會曉講話的時陣，𪜶爸爸就誠煩惱伊的發展，厝邊閣愛共伊鼓勵講彼是「大格雞慢啼」，請伊莫緊張。1 厝邊講的話誠實有影，阿明少年時代真𠢕講話，有當時仔會予人嫌講伊𠢕弄喙花，定定共人騙甲戇戇踅。 阿明體力誠好，有擋頭閣真饞食。細漢時有一改伊一直共阿兄阿姊討物件食，予阿媽共罵講伊「目睭掛斗概，看人物就愛」。阿明就算逐頓飯都已經食四五碗矣，體格猶是真瘦，有人就按呢講伊是「瘦田𠢕欶水」。教典嘛有記錄著伊佇學校中晝頓食傷濟食歹腹肚的故事，閣有伊佇走標比賽得著頭名的故事。個性的部份逐家對伊的評價其實是差真濟，佮伊無捌遐深的人會講伊誠陰鴆，捎無伊咧想啥，毋過伊的好朋友攏講伊其實是一个古意的人，另外伊其實嘛真好頭喙，人緣袂䆀。阿明嘛真好生張，教典有記錄著伊佮同學練閹雞行的故事。 阿明大漢了後就徙去臺北拚事業開店做生理，做三年外就做甲真發達，順順利利娶某、成家立業。in 某嘛誠傑出，有一改阿明想欲借錢擴展事業開連鎖店的時陣，佳哉 in 某有好好仔去評估風險共伊阻擋，抑無阿明可能彼改就會舞甲破產呢。阿明除了做生理以外，閣有去予人牽去做師仔，嘛做甲真出眾。阿明閣誠有孝，攏有共伊骨力做穡的所趁寄轉去厝裡。生囝了後嘛了解人所講的「手抱孩兒，才知爸母時」的意義。 阿明退休以後就無遐順利矣，伊凊彩共伊的退休金攏提去炒股票，想欲一睏仔就好額，煞共錢攏輸輸去，伊傷晏才學著「欲好額等後世，欲做官學做戲」的道理，已經袂赴矣。伊的個性閣傷陰鴆，閣愛弄喙花，逐改攏袂堪得人講得，見若講著伊的毋著，伊就「見笑轉受氣」，實在誠害。in 囝閣真不孝，所致阿明的人生尾段是真孤單，無人欲共伊照顧。

阿明的人生俗語選

以上是教典阿明的一生，透過阿明的人生故事會當學著真濟俗語佮做人的道理。看阿明人生的起起落落予我真有共感，分享予逐家。今年教典更新共所有的俗語攏增加例句，共阿明精彩的人生故事講甲閣較完全，例句錄音是失控的臺語課林良儒先生錄音的，推薦逐家去聽去學。 教典另外閣有阿英、阿華、阿美的人生故事，歡迎逐家嘛做伙去研究，佇留話分享你的心得。 以下是阿明人生俗語選，請逐家共阿明的人生智慧學起來！

  1. 近山剉無柴，近溪擔無水。 Kīn suann tshò bô tshâ, kīn khe tann bô tsuí.
  2. 大格雞慢啼。 Tuā-keh ke bān thî.1
  3. 歹竹出好筍。 Pháinn tik tshut hó sún.
  4. 目睭掛斗概，看人物就愛。 Ba̍k-tsiu kuà táu-kài, khuànn lâng mi̍h tō ài.
  5. 欲好額等後世，欲做官學做戲。 Beh hó-gia̍h tán āu-sì, beh tsò-kuann o̍h tsò-hì.
  6. 食無三把蕹菜，就欲上西天。 Tsia̍h bô sann pé ìng-tshài, tō beh tsiūnn se-thian.
  7. 手抱孩兒，才知爸母時。 Tshiú phō hâi-jî, tsiah tsai pē-bú sî.
  8. 見笑轉受氣。 Kiàn-siàu tńg siū-khì.
  9. 瘦田𠢕欶水。 Sán tshân gâu suh tsuí.

  1. 20250622 補註：後來教典編輯團隊可能是認為這句有負面意涵，改做其他例句矣，原始例句內文是「阿明五歲矣，講話猶講袂清楚，厝邊看著𪜶老爸遮煩惱，就講：「大格雞慢啼，安啦！」 ↩︎ ↩︎

教典僻智識系列
  1. 巷仔內才知影的教典外來語詞
  2. 教典的「漢羅濫寫」例句
  3. 恁兜的滷肉飯是啥款？滷肉飯的詞目更新
  4. 教典阿明的一生
  5. 教典大惡人——名姓袂當講出來的「彼个人」
  6. 教典相命術——揣著你的教典命運詞
  7. 教典的「華語借音詞」
  8. 遮的詞恁兜攏按怎講？教典內底的「方言無差表」
  9. 「量量量量量」同學的名字有 32768 種讀法，你敢會曉唸？
  10. 注音做名姓嘛有讀音？
  11. 關係教典俗諺的一寡僻智識
  12. 教典上討厭的三種人
  13. 有​輕聲意思就無仝的詞
  14. 連寫詞組當中有大寫的詞目
  15. 教典教你按怎做人
  16. 教典十誡開放下載、列印
  17. 仝款漢字無仝音義的詞
  18. 教典收錄的假疊詞
  19. 大量名姓做一改揣——做一改講我的名
  20. 教典阿明的一生——第二季
  21. 教典例句四个發音人
  22. 教典地方僻智識
  23. 連字符入門①－「詞」內底的音節連寫
  24. 連字符入門②－「詞組」內底的詞「基本上」分寫
  25. 教典上長
  26. 教典上濟
  27. 台語聽寫練習系統
  28. 教典 ABC | CAB 詞目組
  29. 正規表達式入門①－基礎概念、按怎揣漢字
  30. 正規表達式入門②－揣羅馬字的撇步
  31. 教典的風聲
  32. 教典詞目詞性索引
  33. 教典新收詞 Notion 表格
  34. 教典十二生相
  35. 失控的教典俗諺語課
  36. 「術仔 su̍t-á」僻智識
  37. 教典2025新漢字音
  38. 有關「字音修訂公告2年」
  39. 教典2025新收詞 Notion 表格
  40. 活用教典101－講座參考資料