「量量量量量」同學的名字有 32768 種讀法，你敢會曉唸？

Sep 15, 2023

教典僻智識系列第 9 篇

這篇文章是台文

莫閣討論啥物下午下班，坐車到下營…… 有偌濟唸法矣，你敢知影「量量量量量」同學的名字有 32768 種讀法--leh？🤪

今仔日的教典僻智識共逐家分享教典「名姓查詢附錄」的一寡僻智識，「名姓查詢附錄」的前身是獨立的網站「講我的名」，今年教典網頁更新了後就整合入來新網站矣。以早的教典收的漢字讀音其實欲處理名姓是無夠的，畢竟教典主要處理的是「常用詞」，毋是「漢字音讀」。像 justfont 的當務字集嘛是共名姓用字分開處理。

教育部對 2019 年開始規畫「名姓查詢功能工作計畫」，針對名姓的讀音建立一个新的資料庫，教典無收的主要就對甘字典補，閣照名姓的原則佮慣勢共字音排列出優先順序。閣較詳細的名姓規則會當去教典的「編輯說明 → 辭典附錄」看

佇名姓的資料庫當中，音讀上濟的字是「量」，這字干焦有收佇「名」的讀音，有「liông、liōng、liâng、liāng、niû、niôo、niū、niōo」八種讀音，姓無收，所以圖片當中會看著頭前第一个符號是小寫的，毋是大寫。拍五个「量」就會得著 8^5=32768 種讀音組合，嘛是名姓查詢附錄上濟的讀音組合。

另外「姜」佇名當中嘛有「kiong、khiong、kiang、khiang、khiunn、kiunn、khionn、kionn」八个讀音、「相」嘛是「siong、siang、siòng、siàng、siunn、sionn、siùnn、siònn」八个讀音，毋過這兩字若是姓就干焦兩个讀音「Siùnn、siònn」佮「Khiong、Kiang」，所致「姜姜姜姜姜」佮「相相相相相」的組合就干焦 2^2 + 8^3 = 508 種讀音矣。

閣，名姓原始資料其實有收老泉腔韻母 ir 佮 er，像「茹」的讀音甚至有 9 个「lû、lîr、jî、jîr、jú、lú、lír、jí、jír」，網站煞袂顯示有老泉腔韻母的音節「lîr、jîr、lír、jír」，可能是意傳的語音合成無支援 ir er ，抑是教典的其他考量才查袂著老泉腔音讀。抑無「茹茹茹茹茹」同學的名姓讀音就有 9^5=59049 種囉！¹

（以上關係「量量量量量」的僻智識由 Tè Sîn-iông 投稿提供）

20250623 註：目前編輯團隊共文字資料的 ir er 韻母相關的資料先提掉矣 ↩︎

教典僻智識系列